പഴവങ്ങാടി ഗണപതിസമക്ഷം

തേങ്ങ അടിച്ചിരുന്നു
ആണ്ടു പരീക്ഷയുടെ തലേന്ന്; ഒന്ന്.
ചിതറുന്ന ചീളുകള്‍
മത്സരിച്ചു പെറുക്കി
കാര്‍ന്നു തിന്നിരുന്നു.
തെറിക്കുന്ന തുള്ളികളില്‍ ഒന്നോ രണ്ടോ
ചുണ്ടില്‍ മധുരിച്ചിരുന്നു.
പൊങ്കാലയുടെ ഫ്ളെക്സുകള്‍
ചെങ്കതിരുകളെ മറച്ചിരുന്നില്ല.

പവര്‍ ഡ്രൈവുകള്‍ തിങ്ങി ഞെരുങ്ങുന്ന
ഇന്ന്
ചെറു ചീളും തെറിച്ചു പോകാതെ
ചാക്കുകളില്‍ ആക്കുന്നുണ്ട്‌.
ചിതറി പാഴാകാതെ തുള്ളികള്‍
കല്‍പ്പാത്തിയിലുടെ
കള്ളിലേക്ക് പകരുന്നുണ്ട്.

പൊട്ടാന്‍ വിങ്ങുന്ന
തേങ്ങ(ലു)കള്‍
സെക്കണ്ടില്‍ ആയിരം.

ആണ്ടു പരീക്ഷ ആണിപ്പോള്‍
എന്നും!
----------