പ്രവാസിയുടെ ശകുനം

ശകുനപ്പെഴ കണ്ട്
തിരികെ വന്നിരുന്ന്‍
യാത്ര തുടരുമ്പോള്‍
കൊച്ചാട്ടന്‍ :-
നമ്മടെ അമ്പലക്കുളം നെകത്തി
ആനപ്പന്തിയാക്കി.
വിഴുപ്പ് അലക്കില്ലിപ്പോള്‍
അണ്ടനും അടകോടനും
പിരിവു തൊടങ്ങി
സ്വര്‍ണക്കൊടിമരം  ഒണ്ടാക്കാന്‍.
മൈക്ക്സെറ്റായി
വായന ഒണ്ട് മൊടങ്ങാതിപ്പോള്‍.
എന്തൊരു കുരിശാരുന്നു
പള്ളിക്കാരുടെ കൂക്കുവിളി.

നമ്മുടെ സ്കൂളിനുമായി മതിലും ഗേറ്റും
നൂണ്ടു വരില്ലിനി
തെണ്ടി പിള്ളേരെ
ഉച്ചക്കഞ്ഞി വിളമ്പുമ്പോള്‍.
അല്‍സേഷ്യന്‍ വന്നപ്പോള്‍ നിന്നൂ
മിറ്റത്ത് കൂടിയുള്ള വരത്ത്പോക്കുകള്‍.
പണ്ടത്തെ നാടല്ലിവിടെ
കഴിയാനിപ്പം പാടാ.

നമ്മടെ വടക്കെത്തൂടെ
ചട്ടീം കൊണ്ട് നടന്നോനോക്കേം...........
പൊറത്ത് ഒള്ള നിങ്ങക്ക് അറിയേണ്ടല്ലോ
ഇവിടെ ഒള്ലോരുടെ വെഷമങ്ങള്‍!

നിന്‍റെ മോടെ കാര്യം
കടപ്പാട് പറഞ്ഞിട്ടെന്താ
അളിയന്‍ ഒട്ടും അടുക്കുന്നില്ല.
അവള്‍ടെ വിക്ക് തന്നെ പ്രശ്നം.

ബെബിയടെ കല്യാണത്തിന്
അവധി ഇല്ലെങ്കി വേണ്ട.
വല്യ തൊകയല്ലേ
ഡ്രാഫ്റ്റ്‌ അയക്കുമ്പോള്‍
പതിവുപോലെ മറന്നെക്കരുത്
ക്രോസ് ചെയ്യിക്കുവാന്‍!
----------------------