നഗരമഴ

വേര്‍പ്പില്‍ക്കുഴഞ്ഞ നഗരം കഴുകി 

മൂക്കെരിച്ച പൊടി വടിച്ച് ഒഴുക്കി 

ചുട്ട ടെറസ്സില്‍ കുളിരായി 

നിറഞ്ഞു കവിഞ്ഞ്

മഴ. 

ചേരിക്കു ചുറ്റും 

ഇനിയില്ല താഴെ ഇടമെന്നറിഞ്ഞു

തളംകെട്ടിനിന്നു മുഷിഞ്ഞ്‌

കറുപ്പ് കലക്കി ഇളക്കി 

കുടിലിന്‍ പഴുതിലൂടെ അകത്തു കേറിപ്പെരുകി 

കുഞ്ഞിക്കണ്ണ്ഉം കാതും മൂക്കും 

മൂടിപ്പരന്ന്‍ 

ഓടയില്‍ ഒരു പാവയെപ്പോല്‍

അമ്മാനമാട്ടി

മഴ. 

അലമുറയ്ക്ക് മോളില്‍ 

ഉറക്കെപ്പാടി 

നഗരനാറ്റം മോന്തി

ലഹരിയില്‍ തലകുത്തി 

കൂപ്പു കുത്തുന്നു മഴ;

നഗരമഴ.

---------------