പാല്‍പ്പായസം

അമ്പലത്തീന്നെന്താണിത്ര വൈകിയേ ?
ഉണ്ണിയിപ്പം വിളിച്ചതേ ഒള്ളു
വാഷിംഗ്ടണീന്ന്.
അവന്‍റെ വയലിന്‍ കൊടുത്തയയ്ക്കാന്‍
തട്ടുംപൊറത്ത് ഒണ്ടത്രേ.
ഷൂസുകള്‍ കൂട്ടിയിട്ട കോണില്‍
ടീവീടെ കാര്‍ഡുബോര്‍ഡ് പെട്ടിക്കു പിന്നില്‍
നമ്മുടെ പൂച്ച പെറ്റ് കിടക്കാറുള്ള..............
ബോ മാത്രമേ പൊട്ടിയിട്ടൊള്ളത്രേ
സാധകം നിര്‍ബന്ധിച്ച ദേഷ്യത്തിന്
അനിയത്തിയെ അടിച്ചപ്പോഴെന്നൊക്കെ
നല്ല ഓര്‍മ്മയവന് !
ഞാനും അതുതന്നെ ചോദിച്ചു.
അവിടാവുമ്പം നല്ല ഇറ്റാലിയന്‍ വയലിന്‍.........
ഇതില്‍
അച്ഛനും അപ്പൂപ്പനും വിരലോടിച്ചതല്ലേ
നാലു വര്‍ഷം അവനുമുണ്ടല്ലോ
കൈത്തഴക്കമെന്നാ പറഞ്ഞേ.
പായസം
അവന്‍റെ പൊറന്നാളിനാന്നു പറഞ്ഞപ്പൊഴാ
നാളിനെക്കുറിച്ച് ഇഷ്ടന്‍ ഓര്‍ക്കുന്നെ!

താനാ പൊക്കമുള്ള സ്റ്റൂളിങ്ങെട്
ഞാനൊന്ന് കേറാം തട്ടുംപൊറത്ത്.
ബീപ്പീം ഷുഗറും പോയ്ത്തുലയട്ടെ.
നല്ല പാല്‍പ്പായസം!
       -------------------