ബാക്കി

തലസ്ഥാനത്ത്നിന്ന് 

വെറും കയ്യോടെ.

ഭാര്യയുടെ പ്രൊമോഷനും 

മകന്‍റെ അത്മിഷനും ബാക്കി .

പെന്‍ഷനായതോടെ 

യൂസ്ലെസ്സ് ആയി എന്നത് 

ശരിതന്നെ ആവുമോ?

കടന്നു പോയ 

കണ്ടക്ടറോട് വീണ്ടും.

"സാറേ ബാക്കി "

ചെളി തെറിക്കുന്ന ഒരു നോട്ടം കിട്ടി.

ക്ഷീണവും കടല്‍ക്കാറ്റും

താരാട്ടു പാടി.

കടവായിലൂടെ 

ഉറക്കം ഒലിച്ചിറങ്ങി.

നാഗസ്വര മേളവും പട്ടുംപൊന്നും 

സദ്യ മണവും............

ഞെട്ടി ഉണരവേ

മകളുടെ കല്യാണം 

ഇനിയും ബാക്കി.

"ആള്‍ ഇറങ്ങണം "

തട്ടാതെ മുട്ടാതെ 

ചവിട്ടാതെ 

ബാഗിന്‍റെ പിടി വിടാതെ 

മുണ്ടിന്റെ കോന്തല കുരുങ്ങാതെ 

പൊടിക്കുപ്പി പോകാതെ 

ഹാവൂ!

മുണ്ടുമാടിക്കുത്തി 

നടക്കുമ്പോള്‍ 

അയ്യോ

എന്‍റെ ബാക്കി.

--------------